ربي قدر بالوبى راه ادركني ** ولي يجي من عند ربي يامحلاه
ربما مالذنب راه يطهرني ** والمرض يقولو طهارة في مولاه
هد الحيل وفي اعضايا دمرني **رجعني مخنوق شاهي نشم هواه
صفو حياتي راح ظري كدرني ** ضاع شبابي وضاع ذاك الزهو معاه
من شوفة لحباب ياناس منعني **ومريض الكوفيد يعدي لي يلقاه
احبابي والاهل جملة هجرتني ** خافو من ذ الهم نعديهم بقضاه
لاذرية لا اموالي نفعتني ** عن ناسي محيوز وعدي نستناه
اموسوس والخوف غادي ينحرني ** ونخمم في لاخرة غدوة كيفاه
باه نقابل يااحبابي خالقني ** ومقصر في طاعتو عظيم الجاه
يوم الخرجة واش ماذرفت عيني ** غي لبعيد يحدثو فيا وعلاه
حت اولادي حد ماجاء قربني **والمبلي بالمرض اهلو تتحاشاه
ضاقت بيا والقطيعة هزتني ** قلتلهم نادو على خويا وين راه
اموالف فالضيق هو يسندني ** يومن نحقر دايمن خويا نلقاه
والوقت لي شافني فز احضني ** ماخافش من المرض ماخمم بقضاه
وارجيتو لله روح وبعدني ** كلمني من بعيد حشمتك بالله
خايف لا نعديك وتولي ظني ** حيرنا ذ الهم راه صعاب دواه
قال الموت لي عل خويي يفرقني ** راني واجد ليه ظرك نتلقاه
ريحة يما ليك هي دفعتني ** ووصيتها خوك عندك لا تنساه
ماهنت عليا نصيبك وحداني ** الكبدة راها صعيبة ياحسراه
اذا رحت شكون فيك يعوضني ** ويناه لي يجي مقام الخو يسواه
انضمك مرة وقابل تعديني ** ويقولو لا مت خوه وراح معاه
فالزوجة والولد ربي يخلفني ** وما الخو لاراح عمرك لا تلقاه
الله لا كوراج والدمع فضحني ** جيت نصبر فيه عدت نوح معاه
عن ساير لولاد خويا عنڤني ** ومقدرني دار لي قيمة باباه
لون نعدي ذ العمر وانا نضني ** مركب خويا مايكونش حد معاه
سهل ياربي شفايا وارحمي ** واحفظلي خويا المازوزي وارعاه
