ڨالتلي مطلڨة هذي مدة
ندمانة ومندمة عمري ضايع
لاوناس نحدثو وقت الشدة
وعرضي بين الناس بالغتبة شايع
فايض وادي راه بالهم اتعدا
مظلومة والكل في عرضي بايع
ياحصراه منين كنت انا وردة
وكان البدر يجي علي خدي طالع
والعشاق يتبعو فيا جحدة
بحر الحب نهولو يغدا تالع
ياماذا رباو عشاقي كبدة
سهرانين وليلهم هم متابع
ماظنيت بحيرتي ترجع جردة
ويرجع وردي شوك في يد الزارع
عشي طاح وزلزلاتو ذالرعدة
والباصور لي ركبتو جا خادع
سقاني كيسان من عسل الشهدة
ورجع ليا سم فالبنة قاطع
قالت عيني طالبة عنها سهدة
وحين نتقفى ڨلبتلي لمواجع
دمعة عيني ساقيتلي لمخدة
واليل وماطال ذالقلب ينازع
من همي ياشاعري درت الغدة
وخبر طلاڨي كي الموت لي فاجع
نكروني اهلي خوالي والجدة
حت الراعي عاد في لحمي طامع
موس اهلي مرشوڨلي وسط الكبدة
مشرشم ڨلبي من الظلم ڨطايع
ڨتلها ردي عالجرح الجلدة
راه الخالق شكوتك ليها سامع
ولي كتبت ياك منها لابدا
نرضى بالمكتوب وبسهمي قانع
بعد العسر يجي اليسر بمودة
بعد الشر يجي الخير ويتابع
نختم بالصلاة عن نور الهدى
رحمة ربي عمت الكون الواسع
دحمان بن سالم
