صبحة عيد
ڨالت هاذ العيد ماهو كي لعياد
و العيد بلا بيـك ما يسوى والو
كـــف الحنـة حاطاتــــو علثماد
نمسح فالدمعات من ڨلبي سالو
فم الباب و جيهتو حطيت ارصاد
من يجبى من شوركم ڨلت نسالو
بت نڨفز و الشفر مـا طاڨ رڨاد
هاهو شفري يا ابـي كان تسالو
يحكيلك ما شاف من كثر التسهاد
ليلة عيد و ضايڨــة بيـه نجالو
ڨلبي يرجى طلتك هاذا ما راد
بوساتك فــي نص خـدي مازالو
يحرڨ خدي كان لحظة مس وساد
يستنى فـــي عـــز بويا و دلالو
مثل المهرة رافضة سڨـي الوراد
ما تروى من غير من يرعى مالو
حضنـي بارد حاساتو حجـرة واد
حضن أبي موحال نلڨــى عدالـو
نعمل طلة ڨلت نخرج كي لعباد
و نعيـد عالناس و الأجـــر انالــو
شفت البسمة زينت فرحـة لولاد
كـــلا واحـــــد دار بيدو دلالـــــو
وانا يدي خاويـــة مالـــــي ڨـواد
حتى زهري غاضني واش جرالو
وسع الشارع بانلي موحش و سواد
كلــي شمس العيد ما جات توالو
ليلـي خيم و لحشا يبكــي غراد
عـــن عـز ن شفناه و ايام ن زالـو
ڨلتلهـــا يزيــــه ڨلبـــــي مالتنكاد
مـا هــو طايڨ فرڨتك يا تهوالــو
راه مدمــر هتكــــو كثـــر التنهاد
عينيا تنبيـــك همـــو و حوالــــو
توقيع : البار البار
ام الطيور المغير الوادي
الجزائر
