قصيدة / مازال …
ـــــــــــــــــــــــــــــــــــــــــــــــــ الشاعر أحمد أخضري *
مازالني محسوب بين اهلي مع لجواد .
ومازال سرجي والركاب على ظهر شرّاد .
ومازال سيفي مانزلش وما دخل لغماد.
ومازال فاللزمة يعدّوني مع لخيار .
ومازال …..
مازال ما نرضى الضيم حليف للمظلوم .
ومازال فالضيڤة نـّح غبينة المـهموم.
ومازال مول نيف قدري ما رخس في سوم .
ومازال فالنّزلات سعد لّي لڤاني جار.
ومازال …
مازال نطعن كل صاعب ما نخاف الموج .
ومازال في تڤدال ارضي ما فلاو العوج .
ومازال طايڨ للنّڤار وما نهاب سروج .
ومازال في جهدي نعفّس ثاڤبة لجمار.
ومازال …
مازال حر مجالسي ديما مع لحرار .
ومازال طيري ما نزل ويحوم بين اطيار.
ومازال فالعلفة وعودي ما خطى مشوار.
ومازال من بعدي الناس يعودو ما صار .
ومازال …
مازال فالترڤاع خيطي ما خطاش العين .
ومازال فالحزة نسلّكها منين منين .
ومازال نلڤطها نهار الشد بين وبين .
ومازال تشورني الناس اذا حمى لڤحار.
ومازال …
ومازال ….
ومازال …
ـــــــــــــــــــــــــــــــــــــــــــــــــــــــــــ
• شاعر من الجزائر
