لوم
ـــــــــــــــــــــــــــــــــــــــــــــــــــ شعر البار البار ـــــــــــــــــــــــــــــــــــ
غير البارح جاتنـــي فالنوم امـا
ڨالتلــي وراه شعـرك يا مضنون
ڨالتـلي مــا ڨلت عنـي لا كلمة
لا شهقة في قافية لا قاف و نون
وينو حسك وينهـي ذيك النغمة
وين الشعر لي تهاطل كي لمزون
واه عليك نسيت تطلبلي رحمة
في بيتين تڨولهم و الشعر فنون
و انتا فارس في اشعارك تتسما
مالك كودة كي تحب تجيب متون
حكمتني في نومتي صهدة حمى
و تملكني صامتــي مثل العڨون
جات البكية كي السحابة دم و ما
و الحسرة في داخلي ڨداه ان لون
عدت نحدث في دخالي بالحشمة
و حديثي للراحلة بكية و شجون
ڨلتلــها يا غاليـــة موتك صدمــة
خطفت عقلي ما بقى فيا موزون
غابت عني رجلتي و الڨلب دمى
و تفتت في حينها مثل التفون
فجعة موتك جاتني مثل اللطمة
خطفتني و اداتني من هاذ الكون
عقلي شارد مــا بقـــى فيا حكمة
غاب الميز و عادلي عقلي مسكون
ڨلبي ينزف فيه من موتك كدمة
بين جنابي حاسو خدمي مسنون
ليلــة موتك جاتنا ليلـــة ظلمــــة
و شهيلي بمحاينو و الجو سخون
و انت روحك طالعة مثل النسمة
عند الخالق راضية من دون ظنون
كون نعدد في خصالك ( ڨال اما )
ملا عرفك ما عرف اما وشكون
اما طهر الطاهرة نبت الحرمــــة
بنت الطلبة و الحرم ثمة مصيون
امـــا يد مسالمــة ليــــها بصمـــة
ببت الكسرة ضيفها موحال يهون
سال الخلوة و السمايط و الخيمة
يحكولك عن ڨلبها في حجم الكون
امــا حبـة نادرة وســط العرمــة
ما شفناش مثيلها موحال تكون
لو تكتب فـخصالــها كل الامـــة
ما توفي من حقها جزء المليون
كل أشعاري مالَـــها عنــدي قيمة
لا عمودي لا النثري لا ملحـــون
ما بردلي خاطري في موت اما
راه معمـر بعدها لاهـب مشحون
يا ناشي لرواح يا مول النعمـــة
تقبلــها فــي جنتــك قرة لعيون
*****************توقيع : البار البار أم الطيور المغير الوادي الجزائر
